عروسة المولد.. شكل بدون مضمون!

السلام عليكم.. أنا مش عارفة أبدأ منين بس من أسبوع واحدة من أصحاب ماما قالت لها أنا عايزة أجوّز ابني لبنتك، وطبعاً الست دية لا هي ولا ابنها يعرفوني، المهم جت عندنا البيت هي وابنها وبنتها وأنا خلال المقابلة قدرت أقرأ نظراتهم (أختي حلوة وبيضا وأرفع مني، وأنا شكلي عادي وسمرا) يعني الناس قالت ناخد البيضا أحسن، على فكرة الكلام ده مش من وحي خيالي ده الكلام اللى الست قالته لأمي صراحة، في اليوم اللي جت فيه الست وبنتها وقالت لماما الكلام ده وإنها عايزة أختي، لقيت بنتها بتنادي على أختي وقعدت تتكلّم معاها بصوت منخفض، أنا طبعاً كنت فاهمة الحوار.

اللي زعلني أوي حركة البنت دي إنها وأنا قاعدة طلبت من أختي إنها تقعد جنبها عشان تقول لها حاجة، وهي مش معترفة بوجودي كأني كيس جوافة، أنا مش فارق معايا ابنها يتجوّز أختي ولأ أنا، المهم عندي إن أختي تتجوّز وابنها أصلاً مش فارق معايا في حاجة، أنا حتى لو شفته في الشارع مش هاعرفه، بس موقف أخته أحرجني بجد، واليوم ماما قالت لي على واحد كان متقدّم لي قبل كده وأنا رفضته مرتين؛ لأني مش حاسة بيه، مش حاسة إني متقبلاه، أنا دلوقتي عندي 28 سنة، وبصراحة أنا مش حلوة بمنظور الناس اللي مش بتشوف إلا المنظر الخارجي، أنا دلوقتي مش عارفة أوافق عليه وتكون جوازة والسلام؟!! ولّا أرفض وأقعد أندب حظي؟!! أنا فعلا مش متقبلاه ساعدوني آخد القرار.