باسم الحب ألغيتِ شخصيتك.. فتحملي مصيرك

خطيبي طبعه وحش أوي...أنا مخطوبة من حوالي سنة
وأخذت خطيبي عن حب؛ بس بعد الخطوبة اتغير، لقيته طبعه وحش أوي وبيضغط عليّ
في كل حاجة؛ يعني أنا كنت بالبس عادي مش أوفر، غصب عليّ إني ألبس النقاب
قال لي يا كده يا أسيبك، ولبسته مع العلم إني عارفة إنه بيحبني، بعد كده
بقى يقف على كل حاجة صغيرة، ويقول لي أنا مش عاوزك، زي مثلاً أنا نمت
متأخر وقلت له إني نمت بدري اتهمني بالكدب؛ مع العلم إني مش باشتغل، وهو
غاصب عليّ إني أنام بدري أوي وأصحى بدري أوي كأني لسه في المدرسة، محرّج
عليّ الخروج؛ حتى مع أمي، ولو حصل وخرجت بعد ما أتذلل يقول لي آخرك برة
الساعة9 يا كده يا يعمل لي مشكله كبيرة، وبرضه يقول لي مش عاوزك،
وأنا اللي أتحايل عليه واتمسك بيه وأخلّي أهلي يكلموه ويرجع.

أنا بحبه أوي أوي وباساعده في كل حاجة تخص
جهازنا مش باقول هو عليه كذا يجيبه وأنا اللي باخد منه الفلوس عشان أجيب
حاجتنا؛ لو اعتمدت عليه بيصرف المرتب كله.

في الأوقات العادية هو بيحسسني إني أحسن
بنوتة في الدنيا وإني عوّضته عن كل حاجة وحشة شافها في حياته؛ لكن أي حاجة
صغيرة يتقلب ويقول لي إنتي زهّقتيني وقرفتيني، وأنا مش عاوزك، وده اللي
حصل.

دلوقتي هو سابني عشان صاحبتي جت عندي وهو
قاعد، دخلت قعدت مع والدتي وتبكي، دخلْت أشوف مالها، هو زعل ومشي وقال لي
إنتي مش بتحترميني ولا بتهتمي بيّ، أنا زهقت منك ومش عاوزك، قلت له فكر،
وبعد عشر أيام كلمته وقلت له وصلت لإيه؟ فات يومين وبعت لي رسالة وقال لي
أنا عند قراري ومش عاوزك.

بعد كل اللي عملته عشانه!! بعد ما عزلني عن
أهلي وأصحابي وغيّر كل حاجة في حياتي!! مع العلم إن ما فيش واحدة في
الدنيا هتقدر تستحمل طبعه غيري عشان أنا بحبة ورضيت بيه على عيبه وقلت
أستحمل.

في الآخر ده جزاتي إني استحملت كل اللي كان
بيعمله فيا، أنا اختصرت المشاكل وإديتكم نبذة عن مدى تفاهتها، أنا مش
هاقدر أبعد عنه، بحبه أوي أوي، حاسة إني هاموت من غيره وأهلي بيكرهوه من
اللي بيعمله فيا، ومستحملينه عشان أنا بحبه.

انصحوني وشوفوا لي حل ربنا يكرمكم أنا هاموت
من التفكير ولا قادرة آكل ولا أشرب، هيجرى لي حاجة؛ بالله عليكم ساعدوني،
وآسفة للإطالة، آسفة.

بصى انا مش هاطول عليكى انتى كرامتك وكرامت اهلك فوق كل شى
هو لو بيقولك انه يسبيك فعلا كده بستمرار
يبقى من الافضل انك تسيبيه وصديقنى هو لو بيحبك هيرجعلك تانى
انما لو مرجعش يبقى ده ميستهلكيش وعايز يمتلكك
ويعاملك كقطعه صلصال ويشكلها كما يشاء ويلعب بها كما يشاء
بعد ذلك ستصبحى مجرد قطعه ديكور يحركها كمايشاء
اكيد انتى فهمتينى

اولا احب احيكى على موضوعك وانشاء الله تلاقى هنا حل
ثانيا احب احى انتة عمرى وقولة احنا مش جين نهدى النفوس
ثالثا ردى لحضرتك انك كدة مش عيب دة كدة بيستهبل سورى يعنى
على العموم حاولى انك تكونى عند كلمتك يعنى اخرجى واعملى الى فى بالك وهوة يكلمك قوليلة لما نتجوز يبقى ليك الحق ان انتة تفرض عليا شروطك انا ليا اب ولو قالك هسيبك قوليلة اتفضل انا عارف انك بتحبية بس هوة كدة بيستهبل معاكى اوى

وفى حل تانى خلى والدك يكلمة ويفهمة ان كدة مينفعشى ولو عاوز يسبك يسبك حالا احسن من اى وقت وحاولى تتماسكى اوك انتى بتحبية بس كدة مش ينفع كلامة معاكى انا متاسف يعنى فى الكلام وانى دخلت فى حاجة مليش فيها سورى
سلام