اختاري بعقلك وحبي بقلبك

أنا بنت عندي 20 سنة، اتعودت على
المشاكل من زمان أوي؛ بس كان دايماً عندي أمل في بكرة، وفي اللي جاي،
وخصوصاً في جوازي بعد كده من الإنسان اللي هيعوضني كل اللي شفته.... أبويا
وأمي منفصلين من زمان، وأنا ليّ أخ واحد شقيق وأخ وأخت من أمي... اتجوزِت
بعد حوالي سنة من طلاقها بوالدي.. أنا كنت عارفة إن الحياة بينهم مستحيلة،
وفي نفس الوقت هي كانت صغيرة أوي على إنها ما تتجوزش، وغير كده إنتم
عارفين المجتمع ما بيرحمش المطلقات..

بس المشكلة إنها اتجوزت بني آدم أقل ما
يقال عنه إنه مريض نفسي، وهي نفسها اتصدمت فيه؛ بس كان قدر ولازم نتحمله؛
خصوصاً بعد ما إخواتي الصغيرين بقوا موجودين وسطينا...

الكلام كتير لكن عشان ما اطولش؛ مشكلتي
الأساسية إني مستنية البني آدم اللي هييجي وياخدني ويعوضني، واللي أحس
معاه كل المشاعر الحلوة اللي أي بنت بتحسها؛ خصوصاً إني لا عمري كلمت شاب
ولا مشيت مع حد والأمور دي.. فقلت كل ده ربنا هيرزقني بيه في الحلال، ومن
غير ما أبدأ غلط.. المهم اتقدم لي كذا واحد وما كانش بيحصل نصيب.. وفي
الآخر جاي عريس ظروفه المادية ممتازة مهنة زي الفل، شكلاً كويس، وفيه كل
حاجة أي بنت تتمناها؛ أخلاق ودين وأدب..... إلخ. قعدت معاه أول مرة وحسيت
إني مش مرتاحة وتاني مرة، وهكذا وبرضه زي ما أنا.

المشكلة هنا كانت في أمي.. أمي كانت
حاسة إن عمري ما هاتجوز الجوازة اللي هي بتحلم بيها ليّ عشان الظروف
بتاعتنا؛ وخصوصا إننا من محافظة كله عارف بعضه، وإحنا ظروفنا الاجتماعية
مختلفة تماماً عن أي حد تاني، وأكيد إنتوا على علم بالمجتمع وتفكيره.

فلما العريس ده جه فعلا وافقت، وبقى
بالنسبة لها يا حياة يا موت، وفعلاً اتخطبت له على غير رغبة مني تماماً،
وكنت في خطوبتي زي اللي ميت لها ميت....

وكله بقى يقول لي إنه كويس ولقطة، وحرام
تفوّتيه، واصبري عليه يمكن تقدري تحبيه، وبقالي على الحال ده حوالي شهرين
ونص تقريباً، ولسه برضه مترددة؛ مع العلم إن هو سافر بعد خطوبتنا بـ20
يوم، وكل اللي بيني وبينه تليفونات...

هوه بيحبني جدا، وبيتمنى لي الرضا
أرضى.. وبيعمل أي حاجة؛ عشان بس يحس مني إني مبسوطة، في حين إني باتعامل
معاه بأسلوب مش لطيف وغصب عني وهو مستحمل كل ده...

هوه كويس فعلاً أنا مش بانكر، بس أنا مش
حاسة منه أي حاجة ومش قادرة أحس وحاولت كتير وحاسة إن مش هو ده البني آدم
اللي استنيته واللي كان نفسي فيه...

الحيرة هنا إني عايزة أوقّف الموضوع،
وكله بيقول لي ده لو مشي مش هييجي حد زيه تاني، وخصوصاً في الظروف اللي
الناس فيها دلوقتي والجواز والبنات... ومش هتلاقي حد يحبك كده، وخدي اللي
يحبك وما تاخديش اللي تحبيه..

وفي نفس الوقت أنا بجد مش قادرة أحبه،
وخايفة أتجوزه، وما احسش بالإحساس اللي طول عمري باستناه.. لأن عمري ما
حسيت إحساس الحب اللي بجد، وخايفة ما اجربوش.

وخايفة أرفضه وأرجع أندم أو ما ألاقيش
الحب اللي بجد نفسي فيه، وفي نفس الوقت أخسر إنسان كان بيحبني.. أنا ما
بحبوش، ومش متخيلاه جوزي ومش عارفة هاقدر أحبه ولا لا...

وأرجوك ما تقولّيش إن أنا لسه صغيرة،
وبافكر بقلبي وبس؛ لأني والله العظيم، اللي مر عليّ في حياتي خلاني بتفكير
60 سنة، وشفت كتير أوي، وبشهادة من الجميع إن تفكيري وأسلوب حياتي غير أي
حد من سني.. أعمل إيه؟

جايز كلامى صعب شويه بس بصى انتى لو متحبوش لو قلتلك متكمليش هظلمك لانك فعلا زى ما بتقولى مجتمعنا مبيرحمش وهيتقال عليكى معقده

ولو قلتلك خليكى معاه وصدقنى الحب بعد الجواز ناجح انا ملاحظاه يعنى ما المجتمع قبل كده مكنش فيه حب حاولو تقعدو مع بعض واتكلمى معاه وبدل بيحب هتحبيه وياست البنات طبقى مثل خد اليحبك ومتخديش ال تحبيه
يارب اكون لحقت اقولك وجهت نظرى معلشى انا عضوه جديده ومش عارف ردى وصل ف معاده ولا متأخر

اتمنى تكون اسعد ف حياتك لو ردى كان اتأخر عليكى

بصى هو كلامك صعب اوى وعذركى فى كل كلامه بس هو بايحبك ممكن تكونى انتى اللى مش سيبها فرصه لقلبك ياحبوا او انتى اصل رفضه حبوا من الاول بس ووالله ياقمر فى الزمان ده قليل اوى تلقى حد بايحبك اووووى كده ويتمنى لك الرضا والحب والسعاده وكمان ازاى تنفصلى عنوا اصل انتى مش باحبى حد اننا نثقول يعنى ان الانسانه اللى بتحبيها ممكن يجى يخطبك وعلشان كده لو انفصلتى عن خطيبك ده هتندمى لان الزمااان ده مبقش زمان الاخلاص وكمان اقعدى مع نفسك شويه وقرار وشوفى انتى عاوزه ايه بظبط شوفى كل حاجه كده وفكر مليون مره لان د حياه زوجيه لو مش هتقدرى تحبيها يابقى لزم تسيبها لان كده يابقى باتموتنى نفسك بايديكى

ويارب يكون الحل ووجهة نظرى وصلت بدرى مش متاخر Crying or Very sad