حبيبتي التي أكرهها

أولاً أحب أشكركم على الموقع الجميل ده وعلى القسم ده بالذات بسم الله الرحمن الرحيم.
مشكلتي
إني باتعذب كل يوم، أنا مخلّص معهد، ولما كنت في المعهد اتعرفت على واحدة
بالصدفة وحبتها جداً أكتر من أي حاجة في الدنيا، وكنت باخلق أي حجج علشان
أشوفها، ولما ادتني نمرة الموبايل بتاعها كنت باكلمها أكتر من تلات مرات
يومياً؛ مع إننا بنتقابل في المعهد، واتخطبت مرتين وإحنا في المعهد، وكنت
باعرف من أصحابها وتعبت نفسياً جداً؛ لدرجة إني اخترعت إني خطبت بنت خالتي
علشان أغيظها؛ بس كانت كدبة باخية لأنها وقّعتني في مواقف محرجة، وبعد ما
تفسخ الخطوبة ترجع لي وأنا كنت باصدّقها.

ولما خلّصنا المعهد عرضت عليها الجواز وسيبت
لها فرصة تفكّر وتقول لأهلها واتفاجأت من ردها إنها عايزة تقابلني اتفقنا
على ميعاد؛ بس أنا ما رحتش وما كلمتنيش تطمن عليّ لمدة شهر، وبعدين عرفت
من واحدة صاحبتها إنها اتخطبت تالت مرة، أنا كرهتها وكنت عايز أنتقم منها؛
بس مع الوقت استسلمت للواقع وتعبت جداً. أنا بقالي 10شهور ما عرفش عنها أي
حاجة ومش قادر أنساها وفيه بنت عايز اتقدم لها هي كويسة ومؤدبة وحاسس إنها
بتحبني؛ بس مش قادر أنسى الحب الأولاني وخايف أظلمها معايا، ساعدوني
أرجوكم أنا عايش مش حاسس بأي حاجة ولا أي حد.

جايز ردى متأخر بس بص كل حاجه قسمه ونصيب وهيا مش نصيبك اقنع نفسك بكده هتلاقى كل حاجه ماشيه معاك لو متأكد مليون ف الميه من حبها واقنعت نفسك انها مش بتحبك هتقتنع