وصفات سريعة لأحلى وجبة عشاء

محتارة تعملي إيه في وجبة العشاء؟!
كل يوم بتعملي نفس الأكلات وزهقتي!!
عايزة تجددي وتفاجئي عيلتك بأصناف جديدة على العشاء؟!

يبقى تابعينا علشان النهارده هنقدم لكم مجموعة من الوصفات السهلة والسريعة..

علشان تعملي بها أحلى وألذ وجبة عشاء..
خليكي معانا..



**********************



طبق بيض فيه كل العناصر الغذائية












بيض أومليت بالجبن والسبانخ
ده طبق بيض مش عادي لأن فيه كل العناصر الغذائية، يعني ممكن نعتبره وجبة كاملة لوحده...

المقادير
4 بيضات
1/4 كوب جبن شيدر مبشور
كوب من أوراق السبانخ
2/3 كوب من الفلفل الأحمر المقطع قطعاً صغيرة
2 كوب بصل مقطع قطعاً صغيرة
1/4 معلقة صغيرة فلفل أسود
معلقة بقدونس مفروم
قليل من الزبدة أو الزيت على حسب الرغبة
قليل من الملح
قليل من الفلفل الأحمر المطحون
معلقة خل تفاح

الطريقة
1- اخلطي الفلفل الأحمر المقطع مع الخل والبصل والفلفل الأسود في وعاء غويط وسيبيهم شوية.

2- هاتي طاسة تيفال وحطي فيها الزبدة وبعدين حطي الطاسة على نار متوسطة.

3-
في وعاء تاني حطي البيض مع البقدونس والملح والفلفل الأحمر المطحون
واضربيهم بالمضرب الكهربي على سرعة متوسطة لغاية ما كل المكونات تختلط
ببعضها وتبقى عاملة زي الزبدة، وبعد كده ضيفي باقي المكونات عليه.


4- صبي البيض في الطاسة وسيبيه على نار
متوسطة من غير تقليب لمدة 4 أو 5 دقايق لغاية ما البيض يستقر، وقبل ما
البيض يستوي تماماً رشي الجبنة وطبعاً الطبق ده لازم يتاكل سخن.. وبالهنا
والشفا



***********************














الفطيرة دي بتتعمل على الفطار أو العشاء












فطيرة المهماري المقلية
ده
نوع خبز طعمه حلو ومسكّر وممكن يتعمل على الفطار أو على العشاء، والخبز ده
ممكن يتاكل بارد أو ساخن، وممكن ناكل معاه جبنة أو مربى...

المقادير
3 كوب دقيق
3/4 كوب سكر
معلقة كبيرة زبدة
بيضة
معلقة صغيرة خميرة مذوبة في قليل من الماء الدافئ
3/4 كوب لبن
3 معالق جوز هند مبشور
معلقة كبيرة حبهان مطحون
زيت للقلي

الطريقة
1- أحضري وعاء غويط واخلطي فيه الدقيق مع السكر وجوز الهند والخميرة والحبهان المطحون، وحطيهم على جنب.

2-
أحضري وعاء تاني وامزجي فيه اللبن مع البيض والزبدة، وبعد ما يمتزجوا
تماماً مع بعض ابدئي ضيفي الخليط ده على خليط الدقيق اللي عملتيه في الأول
بس خلي بالك إنك هتضيفيه بالتدريج وبالراحة، وفي أثناء الإضافة بتقلّبيهم
مع بعض علشان يعملوا عجينة متماسكة وناعمة، وبعدين غطّي العجينة دي بقطعة
قماشة وسيبيها في مكان دافئ لمدة ساعة علشان تخمر.
3- قسمي العجينة لـ 6 قطع متساوية وافردي كل قطعة على شكل دائرة يكون
سمكها حوالي 2 سم، بعد كده قطّعي كل دائرة من اللي عملتيهم أربع أرباع.

4- بعد ما قطعتي العجينة سخّني زيت كتير في طاسة عميقة وبعد ما
الزيت يتسخن ابدئي اقلي مثلثات العجين اللي عندك فيه، وقلّبيها كذا مرة
لغاية ما تاخد لون ذهبي جميل وتطفو على سطح الزيت، وبعد كده طلّعيها..
وبالهنا والشفا.


**********************














التارت ده ممكن يبان صعب لكن طريقته سهلة جداً












تارت بالجبنة والبسطرمة
التارت ده طريقته سهلة جداً ومكوناته كلها متوفرة في أي بيت..

المقادير:
العجينة:
3 كوب دقيق
2/1 كوب زبدة سايحة
2/1 كوب زيت
2/1 كوب لبن
بيضة
ذرّة ملح
كيس بيكنج باودر ينقص منه ملعقة صغيرة علشان هنستخدمها في الحشو

الحشو:
8/1 كوب جبن موتزاريلا، أو رومي على حسب المتوفّر عندك
مثلث روكفور أو نستو
8/1 كيلو بسطرمة
زيتون أسود
معلقة بيكنج باودر
بيضتين
كوب زبادي
كوب لبن
3 معالق دقيق

الطريقة:
أولاً تحضير العجينة:
1- نخلط الزبدة مع البيضة واللبن والزيت وبعدين نضيف عليهم الدقيق شوية شوية، وبعد كده الملح والبيكنج باودر.

2- هاتي الصينية وادهني قاعدتها سمنة ودقيق وبعد كده افردي عليها العجينة.

3- ضعي الصينية في فرن ساخن لمدة 20 دقيقة.


ثانياً تحضير الحشو
1-
اضربي جميع مكونات الحشو -ما عدا الزيتون- في الخلاط، وحطّي الحشو فوق
العجينة اللي طلّعتيها من الفرن، وبعد كده وزّعي الزيتون على الوش.

2-
توضع الصينية في فرن ساخن ونختبر سواها كل شويه بإننا نغرس فيها سكين؛ لو
طلعت السكينة من غير ما يكون عليها عجين يبقى كده التارت استوى.. وبالهنا
والشفا.



***********************














طبق مميز جداً وله فوائد غذائية كتيرة












كبدة إسكندراني
ده طبق مميز جداً لو عايزة تعملي وجبة عشاء مميزة، وكمان له فوائد غذائية كتيرة ومش بياخد وقت خالص في تحضيره..

المقادير:
1/2 كيلو كبدة طازجة ومقطّعة شرائح رفيعة
۲ حبة فلفل أخضر مقطعة
فلفل أحمر حار (حسب الرغبة)
٥ فصوص ثوم
حبة طماطم مقطّعة قطعاً صغيرة
۳ معالق كبيرة خل
عصير ليمونة
زيت زيتون
ملح - فلفل أسود - شطة (حسب الرغبة)

الطريقة:
1- هاتي طبق كبير علشان تتبّلي فيه الكبدة بعصير الليمون والخل والملح والفلفل والشطة.

2- ضعي الزيت على النار وشوّحي فيه الثوم قليلاً، وبعد ما لونه يبقى ذهبي ضيفي الفلفل الأخضر والفلفل الحار.

3-
وبعد كده ضيفي الكبدة وفي الآخر خالص ضيفي الطماطم المقطّعة، وقلبيهم
قليلاً على نار هادية لغاية ما تحسّي إن الكبدة استوت، وبعد كده قدّميها
وهي سخنة.. وبالهنا والشفا.


**********************














طبق العجة بيعتبر وجبة متكاملة












قرص العجة الأخضر
العجة دي من الحاجات اللي بتعتبر وجبة متكاملة، وممكن تنفع كوجبة فطار أو عشاء..

المقادير:
بيضتين
٤ معالق بقدونس مفروم
معلقتين بصل أخضر مفروم
فلفل أخضر حار
ملح - فلفل أسود
معلقة زبدة

الطريقة:
1- اضربي البيض بالشوكة كويس، وبعد كده ضيفي عليه البصل الأخضر والبقدونس والفلفل والملح والفلفل الأسود.

2-
هاتي طاسة وسخّني فيها الزبدة، واقلي فيها البيض على الوجهين لغاية ما
تستوي، وبعد كده حطّيها في طبق التقديم، وزيّنيها بالبقدونس.. وبالهنا
والشفا.


*************************














الطبق ده سهل جداً ومش هياخد منك ربع ساعة













بسكويت بصوص الشوكولاته
دي
وصفة سهلة جداً، ومكوناتها موجودة ومتوفرة في كل بيت، ومش هتاخد منك أكثر
من ربع ساعة في تحضيرها؛ ده غير إنها بتدّي طاقة كبيرة، وممكن إنك تكتفي
بها كوجبة للعشاء...

المقادير:
5 بيضات
فانيليا
5 معالق سكر
5 معالق كاكاو
ربع كيلو زبدة طرية
2 قالب بسكويت ماري (أو أي نوع بسكويت موجود عندك، وممكن تستبدليه بشرائح كيك تكون باقية عندك)

الطريقة:
1- يضرب البيض مع الفانيليا والسكر والكاكاو والزبدة في الخلاط الكهربائي إلى أن يتجانس الخليط.

2- هاتي صينية بايركس، وكسّري فيها البسكويت لقطع صغيرة، وممكن تستبدليه بشرائح الكيك زي ما قلنا.

3- صبي خليط الكاكاو والزبد على البسكويت من فوق.

4- ممكن تزيّني وش الصينية بكريم شانتيه أو بشرائح الموز على حسب رغبتك.. وبالهنا والشفا.

هههههههههه
ده جزء من تعليمك
والبركه فيكى انتى
مرورك على الراس